بختیار فرخ (مقدمه دکترصدیق بر آثار دیگران)

مرکزی ایران تورکجه‌سی، تورکجه‌میزین اسکی دؤنمی‌نین قالیقلارینی اؤزونده ساخلاییب قورویان بیر تاریخی شیوه‌دیر. ساوا، همدان، قوم و اصفهاندان تا شیرازا قده‌ر یاییلیب اوزانان بو شیوه‌ده، زنگین سؤزلو ادبیات خزینه‌لری و سؤز اینجیلری یاتمیشدیر. مأذون و تیلیم خان کیمی عارف سؤز اوستادلاری یئتیرن همین شیوه‌ده دانیشان ائللرین، آجیناجاقلی و اوزون اوزادی مبارزه‌لر تاریخی‌ده واردیر. طبیعت ایله ساواش بیر یانا دورسون، بو قهرمان ائللر تاریخ بویونجا اجتماعی و سیاسی عدالت‌سیزلیکلر و قانلی قادالی شاهلیق رژیملری علیهینه مبارزه‌لر آپارمیشلار، آنا وطن و ملی ناموسو قوروماق ایچون خارجی دسیسه‌لرین‌ده قارشیسینی آلمیشلار. بونا گؤره‌ده همین ائللرین ادبیات خزینه‌لری، حماسی بویالار ایله زنگینلشمیشدیر.

بونون یانیندا لطیف بیر غنایی و رومانتیک شعر توپلوسودا یاشاماقدادیر.

ایستر حماسی و ایستر غنایی قوشغولارینی ایلهام وئریجیسی خلق و یارادیجیلاری ائل شاعیرلری اولموشلار. همین شاعیرلر ایندی‌ده ائل ایچینده یاشاییرلار و ائلین سؤزلو- یازیلی ادبیاتینی زنگینلشدیریرلر.

الینیزده اولان مجموعه همین فداکار ائل شاعیرلریندن بیریسی‌نین اثریدیر. اونون قهرمانلیق طلب ائدن، ائل دیلینه و ائل ناموسونا سایغی بسله‌مگی، ایندی مدرن ادبیاتیمیزدا هدف ساییلماقدادیر.

شاعیر بختیار فرخ، اؤز شعرلرینده بیر طرفدن کئچمیش ائل شاعیرلری‌نین دیلیندن ایلهام آلیر و دیگر طرفدن جانلی و اویناق خلق دانیشیغیندان غیدالانیر.

شعری، او قده‌ر ساده و اوره‌گه یاتاندیر کی بیر اوخوماق ایله یاددا قالیر:

گؤیول پرواز ائیلر چیخا قفسدن،

اورک قارالیبدی یامان هوسدن.

آخیر دوشر شیرین جانیم بوسدن،

نئینیم کی بی‌وافا منه یار دییل.

 

بختیار فرّخون بوتون یارادیجیلیغیندا دوغما ائللره سایغی دالغالانیر. سؤز یوخ کی اونون ایلک شعر مجموعه‌سی مثبت قارشیلاناجاق و گله‌جک اثرلری‌نین یارادیلماسینا بیر باشلانغیج کیمی، اؤز اهمیتینی حیفظ ائده‌جکدیر.

نوشتن دیدگاه


تصویر امنیتی
تصویر امنیتی جدید