سایت دوستداران دکتر حسین محمد زاده صدیق

سهمانلایان: حسن کریمزاده، اؤن سؤز: دکتر ح. م. صدیق، نشر تکدرخت

آذربايجان عاشېق شعری تۏپلوسو، دنيا ملّتلری آراسېندا یاشایان سؤزلۆ ادبیات نمونه‌لری و مجموعه‌لری ایله مقایسه‌ده، تایسېز و شانلې بیر تۏپلو کیمی گؤز اؤنۆنده‌دیر. ایندی بو مجموعه‌نین یارادېلېشې و یاشاماسې بیر اؤنملی و مهم مدنی اۏلای کیمی دنیادا تانېنماسې و ثبت اۏلونماسې دا بو ادعایا آیدېن بیر ثبوت اۏلا بیلر.

عاشېق شعری و عاشېق ادبیاتې، یۆز ایللردن بری اؤلکه‌میزین باشدان باشېنا، خلق ایچینده یایېلمېش و منیمسه‌نمیش و سئویلمیش بیر ده‌ڲر بیچیلمز، ائنی- بۏیو اؤلچۆیه گلمز، باشې- سۏنو بیتمز، انسانلارېن داخلی عالملری، هیجان و اضطرابلارېنې احتوا ائدن مجموعه‌دیر. شاه ختایی زمانېندان بو گۆنه کیمی ساواشلاردا، یاسلاردا و تۏیلاردا فعال اشتراک ائدن عاشېقلار، ائللریمیزین معنوی دده‌لری کیمی بیر عمومی حال اۏلاراق نیسگیللی یاشامېشلار و ظلم تاپداغې اۏلان ائللر ایله بیرگه مبارزه‌لره قۏشولموش و فاجعه‌لی یاشام سۆرمۆشلر.

کئچن یۆز ایلده آجېناجاقلې حیات سۆرن، آدې‌دا ایتگین دۆشن اوستاد عاشېقلارېمېزدان بیری‌ده «خیاولی مسکین اسد»دیر. ایندی اۏنون نوه‌سی خیاو شهرینده یاشایېر. همین شهرین علمی آراشدېرمالار ایله مشغول اۏلان غیرتلی گنجلریندن آقای «حسن کریم‌زاده»، «مسکین اسد»ین نوه‌سی و اؤزۆنۆن باشقا دۏستلارې‌نېن یاردېمې ایله، اۏنون سینه‌لرده ساخلانېلان شعرلرینی تۏپلایېب بیر آرایا گتیرمیشدیر. اۏنون بو کتابی حاضرلاماقدا نه قده‌ر زحمته قاتلاندېغې بیزه آیدېندېر. سؤز یۏخ کی بو کتابېن نشری، مسکین اسدین یاشایېشې و یارادېجېلېغې ایله علاقه‌دار گله‌جک آراشدېرمالارا بیر باشلانغېج سایېلېر. من عاشېق شعری خزینه‌سیندن بیر جواهر سایېلان بو کتابېن نشری اۆچۆن، تۏپلایانی، اۏنون دۏستلارېنې، خیاولېلارې و بۆتۆن ائللریمیزی تبریک ائدیرم.

گیریش

اوشاقلېقدا بیزیم کندده[1] آش پیشدی گۆنۆ اۏلاردې[2] قېزلار دسته- دسته باغلارا گئدیب "گؤیکۆفۆ و نهننی کۆفۆ" آسېب، شادلېق ائده‌ردیلر و ماهنېلار اۏخویاردېلار:

اما اۏ گۆندن بو گۆنه قده‌ر، هر گۆن بیر دفعه آغزېمدا دئدیڲیم، ایلک صحیفهده یازدېغېم ماهنېدېر. بو شعر منیم روحوما یۏل تاپدې. بؤیۆدۆم و بو شعری اؤزۆمچۆن آچېقلادېم، گؤردۆم هه باشېمېزې قېزېل اۆستۆنه قۏیوب آج یاتېرېق و قېزېل تئشته قان قوسوروق گره‌ک آتالارېمېز و قارداشلارېمېز بیر تیکه چؤرهک تاپماق اۆچۆن غربته یۏللانالار و بالالار و باجېلار، آتا و قارداش یۏلو گۆدهلر کی آتامېز و یا خود قارداشېمېز غُربتده ایشلهمکدن گلهجک و یا بیزه پول یۏللایاجاق و بیز قېزېل سېرغا آلاجاغېق. گؤردۆم کی هر بیر ملّتی بئله اسیر سالماق اۆچۆن اوّلجه اۏنون دیلین و قهرمانلارېن الیندن آلېرلار سۏنرا اۏ خلق بیر تیکه چؤرک تاپماق اۆچۆن یادلارا ایشچی اۏلور. من اؤزۆمه بیر بورج سایاراق و اؤز بورجومو ائلیمه اؤده‌مک اۆچۆن، ایتمَکده اۏلان بیر ادبی شخصیتین یازېلارېن و شعرلرینی تۏپلایېب، ملّتیمه هدیه ائدیرم. امید ائدیرم هر بیر آذربایجانلې دوست- دشمن گؤزۆنۆن قاباغېندا اؤزلرینه بیر وظیفه بیلیب اؤز ملّتینین و ائلینین بختهور اۏلماغېنا قدم گؤتۆرهلر.

[1] مشکین شهرین «صاحب دیوان» کندی.

[2] ایل بایرامې‌نېن اوّل گۆنۆ، «آش پیشدی گۆنۆ» آدلاندېرېلېر.